مظفر النواب
مو حزن لاجن حزين
مثل ما تنكطع جوا المطر
شدة ياسمين
انه كتلك مو حزن
لاجن حزين
مثل صندوق العرس ينباع فردة عشك من تمضي السنين
أنه كتلك
موحزن
لاجن حزين
مثل بلبل كعد متاخر
لكه البستان كلها بلايا تين
مو حزن لا موحزن
لاجن احبك من جنت يسمر جنين
فاركت انته السفينة
وانه جايبلك بحر
خفت ما يكفيك عشك الناس توصل فرح قلبك
كعديت الثلج من نومه الثجيل
سبلتلك سلسبيل
جبت طوفان الحلم
شفتك مثل ممسوح بغياب الشمس
فاركت حلم الناس
ومليت السفينة والسفر
شلون قلبك طاوعك ما تكف ع الجيدوم
وجهك ليل ونجوم وحلم
تنطينه كل لحظة اتجاه الريح
تشتاك القمر يطلع قمر
مابجيتك ما بجيتك
انه بجتني السفينة
منين ما طش الرذاذ تفك قبلها تريد تبحر
تدري نوبات السفن
لو ضاج خاطرها بجبن قبطانها تسورب وحدها
تدري نوبات المحبة تمل طبع محبوبها
ويغفى على جتافي السهر
ما بجيتك
مدري منهو بصدري يبجي
مدري منهو يشكك بقلبي الكواغد
مدري منهو يريد يسافر
مدري منهو يجرني بيدر للمطر
مابجيتك
درت عيني للبحر
ابجي المسافات الهمتها وياك
تجذب
انت تجذب ما بجيتك
انه هديت السفينة وسيستها
شراع اشكب الريح
ولاخاروعه عندك بالصبخ تفتل قهر
مابجيتك
انه من دموعي جايبلك بحر
No comments:
Post a Comment